महाराष्ट्रेमायीर २ कोटी गोरमाटीवास पुस्तकेर विक्रीर दकान फक्त चार

लक्षवेधी 

महाराष्ट्रेमायीर २ कोटी गोरमाटीवास  पुस्तकेर विक्रीर दकान फक्त चार

१) गोर बंजारा प्रकाशन -नागपुर
२) बंजारा पुकार -नांदेड
३) दमाळ प्रकाशन -जिवती
४) धोळी बुक डेपो -जालना

गोरमाटी व्हाट्सअप, फेसबुक, इंस्टाग्राम, वाचनालय, गोर बंजारा साहित्य संमेलनेर माध्यमेती वाचनेर भुक भगारेछं.

वाचन चळवळेन गती देणो गरजेर छं.

✍️ याडीकार पंजाब चव्हाण पुसद -९४२१७७४३७२

••••••••••••••••••••••••••••••••••••••••••

गोरमाटीम एक प्रसिद्ध केणावंट छं.... 

वाचीया तो बचीया
बचीया तो खाया
खाया तो पिया
पिया तो सदरीया

करण कछं वाचेती मनक्यारो जीवन समृद्ध बणजावछं. आतराच कोणी तो नवीन आलम दुनियार ओळख हेजावछं. पुस्तक म्हणजे मनक्यारो खरो मित्र! नवनवीन आव्हान स्विकारेर हिय तो पुस्तक वाचणो, माहिती लेणो घणो महत्वेर छं. अनेक विचारवंत लोकुन पुस्तक वाचेर सवय रछं. पण गोरमाटीर पुस्तक कत मळछं जकोण मालम रेयेणी. 
२ कोटी रेयेवाळे महाराष्ट्रेमायीर गोरमाटीवास पुस्तकेर दकान फक्त आज रोजी चार छं. करण आपणों साहित्य तांडा तांडा ताणु पुछेणी ई घण मोठ शोकांतिका छं. आपण गोरबोली भाषान आठवी सुचीम नाकन वोन दर्जा मळायेवास एकवडी प्रयत्न कररेछां.पण गोरमाटीर पुस्तक खरेदी करेवास आपण आंघ बढरे कोणी.फुकट पुस्तक मांगेवाळेर संख्या दनेती दन बढरीछं. खरो देखन दिटे तो गोरमाटी मायीर उच्चशिक्षित जसे प्राध्यापक, डॉक्टर, इंजिनियर, क्लासवन अधिकारी, विचारवंत, इतिहास संशोधक आणि मोठे मोठे उद्योजक लोक जास्तीत जास्त गोरमाटीर पुस्तक खरेदी करेन चावछं. पण वो लोक एक रपीयारी पुस्तक खरेदी करेणी.आसे लोकुन तो दलित लोक मानेणी कारण वो लोक दीक्षाभूमी नागपूर आणि चैत्यभूमी मुंबई आत लाखो रपीयार पुस्तक खरेदी करछं.पण आपण गोरमाटी पोहरागड, उमरीगड आणि वंटागळीन  लाखो रपीयार बकरा काटन चले जाव छं.पण शंभर रपीयारही पुस्तक मोल लेयेणी. येरो घणो दुःख वाटछं.आपण गोरमाटी लोक पुस्तक मोल लेयेवास आंघपाच करछं.करण गोरमाटीर साहित्य चळवळ आंघ बढरी कोणी. आपण लोक नवनवीन साहित्य वाचेर हुश भगायेवास ये लोक व्हाट्सअप, फेसबुक, इंस्टाग्राम आणि कती कती वाचनालयेर आसरो लेरेछं. पण पुस्तक खरेदी सामु वळरे कोणी...लारेर चार पाच वरसेती सोशल मीडियार माध्यमेमायीती गोरूर वाचन संस्कृती दनेती दन बढरीछं. ई गोरमाटी गणसमाजेवास घण मोठ उपल्ब्धी छं. पुणे -मुबंई पेक्षा महाराष्ट्रेमायीर नानक्या नानक्या तांडामायीर लोकुन वाचेर, नवीन पुस्तक मोल लेयेर सवय लागतु दखारीछं. पण सारी महाराष्ट्रेमायीर २ कोटी गोरमाटीवास पुस्तकेर मोजन चार -पाच दकान दखारीछं. करणच आपण गोर बंजारा साहित्य चळवळ आंघ बढरी कोणी.येरेवास जास्तीत जास्त लोकुतांणु गोरमाटीर पुस्तक पुछायेवास आपणेंन विभागवार साहित्य संमेलन, पुस्तक प्रदर्शन लेणो अंत्यत गरजेर वाटछं. 

बंजारा पुकार बुक डेपो नांदेड -अवीनाश चव्हाण मो.नं.-९७६३२९१७७४

साप्ताहिक बंजारा पुकारेर संपादक गोविंदराव चव्हाण ये  सुरुवातेन सन २००० सालेम ५०० पेपर काढण गोर साहित्य चळवळ बढायेरो पेलो काम महाराष्ट्रेमायी किदेछं. आज बंजारा पुकार पेपर पुरे भारतेम भरारी माररोछं. ५००० प्रतीरो खप आज ये पेपरेरो छं. अनेक नवीन साहित्य जसे कथा, लेख, कविता, साकी ,साक्षर, केणावंट, वांजणा, आसे नाळी नाळी प्रकारेर गोर साहित्य आपणे पेपरेम विनामूल्य छापतांणी अनेक लेखक/कवीन वजाळेम लायेरो अनमोल काम लारेर पचीस वरसेती वो कररेछं.आतराच कोणी तो २०१० सालेम कळमनुरीर रामचंद सात महाराजेर जत्राम पेलीवणां पुस्तकेर दखान लगाढण आबेताणुं जवळपास गोरुर ५००० ते ६००० हजार पुस्तक विक्री करनाके छं. नवनवीन लेखक/कवी  आणि साहित्य रसीक लोकुन वाचेवास आपणें बंजारा पुकारेर माध्यमेमायीती वाचेवास साहित्य उपलब्ध करदिणे छं. करण गोरमाटी गण समाजेमायी लोक कला, लोक संस्कृती टिकायेवास येंदुर घणी मदत हुयी छं.आनेक एम फिल, पीएचडी करेवाळे संशोधक छिछाबरेन बंजारा पुकार पेपरेर मदत हेमेली छं. बंजारा पुकार पेपरे सामुती लेखीका चंद्रकला नाईक मुंबई येंदूरो पुस्तक *'संत सेवालाल चरित्र"* ये पुस्तकेर २५०० हजार प्रतीर प्रकाशन करन विक्री करेम आयीछं.सपना प्रकाशन नांदेड वडीती दी पुस्तकेर प्रकाशन करतांणी आनेक लेखकेन साहित्य शिवारेम लखेवास प्रेरणा दिणे छं.ई वतरीच वात  खर छं. आज साप्ताहिक बंजारा पुकारेर यशस्वी कारभार अविनाश चव्हाण चलावछं. करण वोंदुर मनःपूर्वक आभार!

गोर बंजारा प्रकाशन नागपूर मनोहर चव्हाण मो.न.- ९६८९६६८६२९

गोर बंजारा प्रकाशनेर प्रसिद्ध संपादक तथा पत्रकार मनोहर चव्हाण नागपूर लालेर २०१३ सालेती गोरमाटीर पुस्तक वेचेरो काम घणे मेहणतेती कररोछं. आज जवळपास गोर बंजारा प्रकाशने सामुती ४५ पुस्तक प्रकाशित करेम आवगेछं.येती नवनवीन लेखक/कवी लोकुन बढावा मळरोछं.अगदी कमी पिसाम लेखक/ कवी लोकुर पुस्तक प्रकाशित करतांणी मनोहर चव्हाण गोरूर साहित्य चळवळ आंघ बढारेछं. करण वोंदुर मनःपूर्वक आभार! 
लारेर बार वरसेम मनोहर चव्हाण जवळपास ५०००० ते ६०००० हजार पुस्तक वेचन साहित्य चळवळ आंघ बढारेछं.आतराच कोणी तो नागपूर, वाशिम आणि हैदराबाद आत गोर बंजारा साहित्य संमेलनेर आयोजन करताणीं गोरूर साहित्य संस्कृती जीवत रखाढेवास प्रयत्न करेरेछं.वोदुर बुक डेपो मायीती घुगरी घालेरो पुस्तक -१०००० हजार, तांडा पुस्तक -२५०० हजार,याडी पुस्तक -१००० हजार, गोर बंजारा लोकांचा इतिहास पुस्तक-२५०० हजार विक्री हेगीछं.सेती जास्त पुस्तक वाशीमेरो साहित्य संमेलन-२०१४ सालेरो भरायोतो जणा वखेछं. पत्रकार मनोहर चव्हाण नागपूर दरसाल २ लाख ते २.५ लाख रपीयार पुस्तक विक्री करतांणी गोरूर साहित्य चळवळ आंघ बढायेरो घणो मोठो काम कररेछं.  दीक्षाभूमी नागपूरेर धम्मचक्र परिवर्तन दिन सोहळा मायी गोरमाटीर पुस्तकेर दकान लगायेवाळो पेलो मनक्या छं.

दमाळ प्रकाशन जिवती गणेश करमठोट मो.नं-९८९०२२१५७७

गणेश करमठोट म्हणजे दमाळ प्रकाशनेर प्रसिद्ध संस्थापक. शिक्षकी पेशा करतु करतु गोरूर साहित्य चळवळ आंघ बढायेवास सन २०१८ सालेती वो गोरूर साहित्य तांडा तांडा पुछायेवास छत्तीसगड, उत्तर प्रदेश, कर्नाटक, तेलंगाना, आंध्र प्रदेश आणि महाराष्ट्रेमायी जत जत गोरूर कार्यक्रम पार पडछं. वोत पुस्तकेर दकान लगातांणी जवळपास गोरूर ५५०० हजार ते ६००० हजार पुस्तक वेचनाके छं. नवनवीन लेखक/कवीन वजाळेम लायेवास गणेश करमठोट दमाळ प्रकाशनेर स्थापना सन २०२० सालेम करताणीं जवळपास १०० पुस्तक प्रकाशित करतांणी गोर बंजारा साहित्य चळवळ आंघ बढायेरो घणो मोठो काम करमेलेछं. पारखेड जिल्हा बुलढाणा मायी गोर गावळयांर जणा संमेलन भरायेम आयोतो जणा एके दनेम ५०० पुस्तकेर विक्रमी विक्री हेगीती. आजही महाराष्ट्रेमायीरच कोणी तो सारी भारतभर फरतांणी गोरुर पुस्तक वेचेरो घणो आछो काम गणेश करमठोट दमाळ प्रकाशनेर माध्यमेमायी कररोछं.करण वोंदुर मनःपूर्वक अभिनंदन!

धोळी बुक सेंटर परतवाडी  तांडो-शिवनारायण राठोड मो.नं-९७६५७०८४८२

हरपणी धोळी राठोड म्हणजे शिवनारायण राठोड येंदुर खटलो
 शिवनारायण राठोड
परतवाडी ता. परतुर जि जालना येंदुन हरपण्णी धोळी राठोड
वेळोवेळी पुस्तक वेचेन सहकार्य करेछं करण वोदुर  नामेती 
धोळी बुक सेंटर दकाणेर नाम रकाडेम आयोछं.
जेमतेम १० वी तांणु शिक्षण शिकेवाळ शिवनारायण राठोड आज प्रसिद्ध लेखक तथा गोरशिकवाडीरो मुखीया काशिनाथ नायक येंदुर प्रेरणा लेनतांणी नवीन पिढी घडायेवास सारी महाराष्ट्रेमायीच कोणी तो भारतभर पुस्तक वेचेरो घणो मोठो काम कररोछं.
पुस्तक वाचेरो आवडतो छंद,
साहित्येपरेरो  भरपूर प्रेम रेयेर कारण आज शिवनारायण राठोड गोरुर साहित्य चळवळ बढारेछं.
लारेर दी वरसेती १००० ते १५०० हजार पुस्तक पार्सल पोस्टेती वाट लगादिणे छं.
महाराष्ट्र, आंध्र प्रदेश, कर्नाटका, तेलंगणा, मध्य प्रदेश, श्रीनगर लदाख, उडीसा, छत्तीसगढ, भोपाळ,
आतरा राज्येम  पुस्तक पुचत करदिणो छं.‌ आबेतांणु  वेगवेगळे पुस्तकेर ४००० हजार ते ५००० हजार प्रतीर खप वेगी छ.
२०१९ सालेती पुस्तक दकान सुरु करतांणी शिवनारायण राठोड गोर साहित्य चळवळ आंघ बढायेरो घणो मोठो काम कररोछं‌. करण वोरो मनःपूर्वक अभिनंदन!!

याडी बुक डेपो पुसद - याडीकार पंजाबराव चव्हाण मो.नं-९४२१७७४३७२

लारेर दी-तीन सालेती गोरुर पुस्तक खरेदी करेर महत्व देखतांणी पुसदेन याडी बुक डेपोर स्थापना करेम आयीछं. 
गोर समाजेर नाळी नाळी विषय लेतांणी आबेलगस २२ पुस्तकेर प्रकाशन करेम आयोछं. जवळपास  २२ पुस्तकेर ३३५०० प्रती छपायेम आयीती. वोमायी आबेताणु याडी पुस्तकेर ४००० हजार प्रती, बंजारा समाज दर्शन-१०००, बंजारा हस्तकलेची शोकांतिका- १०००, शिकारी राजा-२५०० , मी डॉक्टर बाबासाहेब आंबेडकरांकडे का वळलो?-५००, अंतस्वर-५००, गोरबंजारा लेखक कवी साहित्य सूची-५००, झगर-५००, सरपंच ग्रामसेवक मार्गदर्शिका-७५०, क्रांतीसुर्य संत सेवालाल महाराज-५०००, दूत आरक्षणाचा-१०००, आपले संविधान आपले हक्क-५००, महायोद्धा लकीशा बंजारा-५००, शूरवीर शहीद सीख बंजारा- ५००, गोर इतिहासातील शुरवीर नायक-६००, लोकनायक वसंतराव नाईक साहेब-७००, संघर्षवीर-१५०, आरक्षणाचा इतिहास-३००, जातीनिहाय जनगणना झालीच पाहिजे?-१०० आसी २०६५० प्रती हातोहात विक्री हेगीछं.
 सेती जास्त पुस्तक प्राचार्य मा. मधुकरराव पवार सर अकोला ये ३५००० हजार रपीयार पुस्तक खरेदी किदे आणि माजी आमदार आदरणीय धोंडीराम राठोड साहेब २०००० रपीया याडी पुस्तकेर १०० प्रत खरेदी करतांणी वोंदुर शाळामायीर छिछाबरेन वेटमेलेछं.वोंदुर म आभारी छुं. दरवर्षी याडी बुक डेपो मायीती १ लाख ते २ लाख रपीयार पुस्तकेर विक्री हेरीछं.पण ये आकडा वाचन चळवळीर दृष्टिकोनेती बरोबर छेंणी.  अखिल भारतीय मराठी साहित्य संमेलन अमळनेरेम पेलो गोरमाटीर पुस्तक विक्री डेपो लगाडेर काम याडीकार पंजाब चव्हाण आणि प्रसिद्ध साहित्यिक तथा प्रतिभावंत कवी मा.राजाराम जाधव साहेब करमेलोछं. 

एकंदरीत महाराष्ट्रेमायीर ३६ जिल्हा पैकी नांदेड, चंद्रपूर, नागपूर, जालना आणि यवतमाळ ये पाचच जिल्हाम गोरमाटी पुस्तक विक्री डेपो छं.बाकी जिल्हाम पुस्तक विक्री केंद्र न रेयेर कारण गोरमाटीर वाचक वर्गेन पुस्तक उपलब्ध हेरे कोणी येरेवास प्रत्येक जिल्ह्याम आणि तालुका लेव्हलेप गोरमाटीर पुस्तक विक्री करेवास महाराष्ट्र शासन पुढाकार लेतांणी नाममात्र भाडेपटीप किंवा शासकीय इमारतीम जागा उपलब्ध करन देणाके तो हरेक प्रकारेर सारी गोरुर लेखकेर पुस्तक विक्री करतु आय. फक्त आणि फक्त गोरबोली भाषा आणि धाटीर उदोउदो करे पेक्षा वाचन संस्कृती सामु लक्ष देणो घणो गरजेर छं. आणि वाचन संस्कृती आजेर काळेम बढायेर गरज छं. कारण नवीन पिढीन गोरूरो गौरवशाली इतिहास, परंपरा,रुढी आणि धाटी कायीच मालम छेंणी. येरेवास वाचन संस्कृती बढाणो गरजेर छं.जर सरकार येमायी मदत किदो तो नक्कीच गोरमाटीरो गौरवशाली इतिहास घरे घरेम पुछेन मदत हेजाय. येरेवास गोर समाजेर मानवायीक मंत्री, आमदार सरकारेर लक्षेमेयी लान देयेरो काम करीय आतरी अपेक्षा करतांणी. बंजारा पुकारेर संपादक अविनाश चव्हाण, गोर बंजारा प्रकाशनेर मनोहर चव्हाण,दमाळ प्रकाशनेर गणेश करमठोट आणि धोळी बुक सेंटरेर शिवनारायण राठोड येंदुर गोर साहित्य चळवळ बढायेर कामेन शाॅलुट करुछुं आणि थांबुछु!

गोळाबेरीज

आज गोर बंजारा समाजेम जवळपास २६६ लेखकेर ५७० पुस्तक प्रकाशित हेगे हिय आसो अंदाज छं - ५७० × १०००= ५७०,००० + दुसर आवृत्ती अंदाजे ५००००=  ६,२०,००० एकुण पुस्तक छपायेम आयेछं उपरेर पाचही बुक डेपो पुस्तक विक्री अंदाजे ९७६५० पुस्तकेर हेगीछ. म्हणजे १५.७५ टक्के पुस्तक विक्री नगण्य छं. आजही लेखक लोकुर घरेम ५,२२,३५० पुस्तक पडेछं. एक पुस्तक ५० रपीयारही पकडे तो जवळपास २ कोटी ६१ लाख १७५०० रपीयार पुस्तक पडेछं. म्हणजे गोरमाटी गण समाजेमायीर लोक पुस्तक खरेदी कररे कोणी हाणु वाटछं. लेखक/कवी घरेर पिसा घालन साहित्य/वाचन चळवळेन गती देयेवास पुस्तक प्रकाशित कररेछं. पण वोंदुर उद्देश सफल हेरो कोणी येरेवास जास्तीत जास्त पुस्तक खरेदी करताणी वाचन चळवळ आंघ बढावा आतरीच अपेक्षा छं.... धन्यवाद🙏🙏!

✍️ याडीकार पंजाब चव्हाण,पुसद - ९४२१७७४३७२