समीक्षा: दादी दादार साकी पोती पोतेर हुकारा

पेनार जमानेर  माणुसकी शिकायेवाळ साकी वजाळेम लायेवाळो अनमोल ग्रंथ!

ग्रंथेर नाम-  📘 दादी दादार साकी पोती पोतेर हुकारा

लेखक ✍️ हरपणीकार मोहन भिकू पवार रा.सिंगोडा - ७४९८०७१४८२

समीक्षक ✍️ याडीकार पंजाबराव चव्हाण पुसद - ९४२१७७४३७२

••••••••••••••••••••••••••••••••••••••••••

पेनार जमानेम दादी दादा साकी केतेते आणि पोती पोत सामळतेते.ये साकी म्हणजे फाकी कोणी हेत्ती तो ये साकी गोरमाटी मायीर छिछाबरेन संस्कार देयेवाळ अनमोल गठडी हेत्ती. ई अनमोल साकीर गठडी हरपणीकार आदरणीय मोहन भिकू पवार साहेब पुस्तकरुपी ठेवा मेलन जायेवाळ छं भियावो!
साधा,सोपा आणि सरळ गोरबोली भाषाम "दादी दादार साकी पोती पोतेर हुकारा" ये साकीर लिखाण लेखक हरपणीकार आदरणीय मोहन भिकू पवार ये करमेलेछं.  ये साकी संग्रहेम मनक्यारे मनेमायीर भाव-भावनार उकल करेवाळी आणि मनक्यान अनमोल संस्कार देयेवाळ अनमोल साकी आपणेंन वाचेन मळछं. गोरमाटी गण समाजेमायीर संस्कारी साकी आणि मनक्यान वाचतुवणां दंग करनाकछं.वाचतु वाचतु हाणु वाटछं की आंघ कायीं छं,आंघ कायी छं आसे विचार करते करते सारी पुस्तक एके दमेम वाच नाकछं. आतरा दमदार पुस्तक लखतांणी लेखक गोर साहित्य शिवारेम खळबळ मचानाकेछं. करण ये पुस्तके र मागणी दनेती दन बढरीछं.
ये पुस्तकेर घण मोठ आणि ये पुस्तकेन घले सरीक प्रस्तावना *गोरूर वाघणं, गोर हरपणी जिजाताई राठोड* लेखमेलीछं ई घण आंणदेर वात छं.  हरपणी जिजाताई राठोड येंदुर प्रस्तावनाती ये पुस्तकेर शान बढगीछं. आतराच कोणी तो ये पुस्तकेर सारी सार प्रस्तावना वाचनाके ती कळेम आवछं. 
पुस्तकेर सुरुवातेमच गोरधाटी मायीर तमाम गोर भायी भेणेन माणुसकीर संस्कार देयेवाळ पेल साकी कतो मोसरेर रेणो ,मोसरेती खाणो वाचेन मळछं.आणि ई साकी सारी पुस्तकेर सार छं.  ये पुस्तके मायीर लखायेम आयी जकोण साकी गोरमाटीर आलम दुनियान धाटी, परंपरा आणि संस्कृती कस हेत्ती ई लक्षेम लादछं. आबेर जमानेम बदलतो जारो जकोण वातावरण, समाजेम दनेती दन हेरो जकोण बदल आणि नाते गोतेम हेरे जकोण लढाई -झगडान थंबाडेवास गोरुर पेनार जमानेर साकीर आजेर काळेम गरज ओळखन लेखक आदरणीय मोहन भिकू पवार साहेब साकीर पुस्तक काढोछं. ई गोरमाटी गणसमाजेवाश घण मोठ उपल्ब्धी छं.
आंघेर काळेर गोरमाटी स्वाभिमानी, प्रामाणिक, मेहनत करेवाळ कष्टाळु आणि मोठे मनेरे हेत्ते.गरीब जरुर र पण वैचारिक संपतीती वो घणे मोठे हेत्ते. ई वात वतरीछं खर हेत्ती. तांडेमायीर नायक जर घरेर बार निखळो तो सारी बाई मनक्या माथेप पदर लेलेतीती. आज काही लोक किलो,डोड किलो सोनो गळेम घालन हिंडरेछं तरी वोंदुन कोयी पुछेंन तयार छेंणी आस गत हेगी छं. आज तांडेम मानपान देये सरीक मनक्याच दनेती दन कमी हेरेछ. आज लोक खोडमोडीया आयतो खाऊ, चावट साळीया सरीक हेगेछं करण लेखक साकी रे माध्यमेमायीती समाज सधारेर प्रयत्न कररेछं.  ये साकी संग्रहेम अंत्यत बारीक बारीक वाते लेखक  साकी संग्रहेमायी मांडमेलेछं. येपरेन लेखक आदरणीय मोहन भिकू पवार साहेबेर अभ्यासु वृत्ती आणि धडपड दखाण पढण. करण जतरा कौतुक करे वतरा कम छं.
ये साकी संग्रहेम चांदा मायीर डोकरी,तुंबडी मायीर डोकरी,रांडेर बेटा सांड,सुरेर साट आन वाघेर पाट,तिन दोस्ता,ठग -महाठग, बकेडी बंढीया, जेर हुशारी वोर मुशाफिरी,चतुर नावी वाडी डोडीरो सावकार आसी मनक्यान माणुसकी, जिव्हाळा,प्रेम शिकायेवाळी साकी एकेती एक फेकान मारे सरीक साकी ये साकी संग्रहेम वाचेन मळछं. ये पुस्तकेर खरो शान हियतो.. "लाख मोलेर बा न रिय पण दि दमडीर याडी रेणो" ई साकी गौरवशाली गोर इतिहास मायीर मातृसत्ताक संस्कृतीर आठवण करन तो दछं पण वाचतु वाचतु रवाड नाकछं. याडी आतरी माया केरीछं कन छेंणी याडी म्हणजे देवेर अवतार छं.  याडीरो जेन प्रेम मळोछं वोरे आतरा भाग्यवान मनक्या छेंणी आणि जेन याडीर प्रेम,ममता, जिव्हाळा मळो कोणी वोरे आतरा दुदैवी मनक्या छेंणी.करणच कछं "स्वामी तिन्ही जगाचा आई विना भिकारी"!

 लेखकेर परिचय

आज मांडवी गोर पट्टाम लेखक मोहन पवार साहेब येंदुरो नाम गाजरोछ. एक काळ आसो हेत्तो की एकलोच लोकनेता बळीराम पाटील मांडवीकर (नाना) पुस्तक लखतोतो वोंदुर बाद आंतरराष्ट्रीय लेखक आदरणीय भीमणीपुत्र मोहन नाईक साहेब लखतेते. आणि लारेर दी वरसेती आदरणीय मोहन भिकू पवार साहेब सिंगोडा येंदुर नाम गोर साहित्य शिवारेम गाजरोछं.आज महाराष्ट्रेमायीर नामवंत लेखक कवी आणि विचारवंतेर गळेमायीर ताईत लेखक मोहन पवार साहेब हेगेछं.आबेताणुं वो १) गोर बंजारो का संक्षिप्त इतिहास सन-२०२२, २) जो कोणी मळो वेदेम ऊ मळो हरप्पणीर गिदेम -२०२३,३) भीमणीपुत्र -२०२३,४) मतरो -२०२५, ५) दादी दादार साकी पोती पोतेर हुकारा -२०२५ आणि ,६) याडीकार -२०२५ आसे छो पुस्तक लखतांणी वो गोर साहित्य शिवारेम खळबळ मचानाके छं. वोंदुन आब रोखतु आव कोणी आतरी वोंदुर शक्ती बढगीछं आणि ई वात गोर बंजारा समाजेवास घण मोठ उपल्ब्धी छं. करण म सेवाबापु चरणी प्रार्थना करुछुं की हमारे लेखक आदरणीय मोहन भिकू पवार साहेब येंदुर शंभर वरसेर आयुष्य देणु 🙏🙏!

सत्य घटनार आधारेर साकी

मनक्यारो जीवन संघर्ष करतु करतु जावछं. प्रभु रामचंद्रेन वनवास घडगो तम हाम कायीं छां? मनक्यान साळीया वांघ फसायेवाळ लोक तांडे तांडेम डगरे हिंडछं. आसेही परिस्थितीम मनक्यान माणुसकीती जगेवास काही तत्वज्ञानेर गरज छं. ऊ तत्वज्ञान गोर लोक पेनार जमानेम साकीर माध्यमे मायीती दादी दादा केतेते जकोण अनमोल साकीर गठडी हरपणीकार आदरणीय मोहन भिकू पवार साहेब ये पुस्तकेर माध्यमे मायीती खोल दिणेछ. 
ये साकी संग्रहेमायीर साकी सत्य घटनापर आधारित छं. तमेन कुणसही साकी काल्पनिक वाट सकेणी येरो कारण म्हणजे लेखक वोंदुर पडदादा,दादा दादी कणेती सांमळी हिय साकी लखताणी मनक्यारे मनेमायीर भावनार उकल करनाके छं.
"दादी दादार साकी पोती पोतेर हुकारा" म्हणजे  पेनार जमानेम आपणे आजुबाजुती जे काही वाते घडीछं. वोज वाते ये पुस्तकेम लखायेम आयीछं. ये आपण संस्कृती,धाटी, परंपरा, गौरवशाली इतिहास, चांदा- सुर्या ताराप हरपणीरो गिद, चांदा- सुर्या,वार नक्षत्र येरो बंजाराती कायी संबंध छं,तिज तेवारेर साकतर,गोर केणावट,सगाई वाया- नातराम बोल जकोण रोमांचक दोहा, आणि शेवटी साकी साकतरेर गोरमाटी गण समाजेम कायी महत्व छं जकोण लेखक अभ्यासपूर्ण मांडमेलेछं. काही वाते लेखक सोबत घडी घडायी वातेही ये साकीर पुस्तकेम लखायेम आयीछं.करण ई पुस्तक वाचेर मन बणजावछं. आतराच कोणी तो *"कुचु तो माॅ मरीजाव न कुतो बाप कुत्ता खाव"* ई साकी ये पुस्तकेर आत्मा छं. ई अप्रतिम साकी वाचेरवणां घण मजा आवछं. आणि गोरुरो गौरवशाली इतिहास आणि संस्कृती कतरी आछं हेत्ती जकोण समजन पढछं. सारी साकी मनक्यान माणुसकी शिकायेवाळ छं . जास्तीत जास्त लोक ये पुस्तकेर स्वागत करण खरेदी करेन चावछं.

लेखकेर तुकारी

डुंगर दरीयाम रेवाळो गोरमाटीर हजारो वरसेती चालती आव जकोण धाटीन आपण गोर साहित्य आणि इतिहास काचा. साकी,साकतर,झमरका,कोड भरे दोहा,केणावट, न्याय -नशाबं, गिद, गौरवशाली इतिहास हामार हारपणी हजारों सालेती गिदेर माध्यमेती जतन रखाडमेलीछ.आणि हमारो इतिहास, साहित्य मुखपाठ छं. करन आपणों साहित्य गिद,वाजंणा,झमरका,भजनेर माध्यमेती जीवतो छं.पण एक वेळ आस आय की हामार बोली भाषा, संस्कृती,धाटी, परंपरा डुबेन लगजाय.कोर आणि गोर वळखाणी कोणी आव करण लेखक तुकारी मारन केरोछं की आब तरी गोर जागो,आपण संस्कृती जतन रखाडेवास मारो नानक्यासो पुस्तक लखोछुं वोन जतन रखाडो.‌‌...आस तुकारी लेखक विशेष मारोजा ये सदरेम लखतांणी अपेक्षा करमेलो छं.वोन मारो पुरो समर्थन छं. आपणही ये पुस्तकेर स्वागत आछे तराती करीय आस आशा रखाडु छुं!
मनक्यान माणुसकी  शिकायेवाळ आणि मनक्या बणायेवाळ ये साकी रो पुस्तक तमाम गोर बंजारा समाजेमायीर सारी लोकुन वाचेन चावछं.आणि सारी लोकुर घरेम जतन रखाडे सरीको अनमोल पुस्तक छं..!
लेखक आदरणीय मोहन भिकू पवार साहेब सिंगोडा येंदुर आंघेर साहित्य विषयी वाटचालेन मार कोटी कोटी शुभेच्छा छं... धन्यवाद!!

चालो आपणो एक फोन लेखकेन साहित्य निर्माण करेवास हत्तीर बळ दछं...!

दादी दादार साकी पोती पोतेर हुकारा

पेज -९४

किंमत -२५० रपीया

प्रकाशक
गोंडावाना प्रकाशन किनवट 

लेखक आणि पुस्तक मळेर ठकाण
हरपणीकार मोहन भिकू विसळावत( पवार)
मु. पो. सिंगोडा तालुका किनवट जिल्हा नांदेड महाराष्ट्र 
फोन लगायेवास- मो. 74 98 0714 82

समीक्षक ✍️ याडीकार, पुसद -९४२१७७४३७२