म सेवाभाया बोलरो छू: मार बोल...से हेन धेन देन सामळो भा

म सेवाभाया बोलरो छू: मार बोल...से हेन धेन देन सामळो भा.

म गोरमाटीन गोरमाटीज को आन कोरीकोरेवून कोरीकोरज को. म कनायी बी चूकन भी सपनेम भी गोरमाटीवून चलो हींदूराष्ट्र की वोर हानू कोनी को. चूकीर दीशाभूल कोनी कीदो. म कनायी कोनी को की मंदीर बांधों, शासकीय पूजा करो, भगवा रंगेर कपडा घालो कोरूकोरेरी बायीदाकल लटार झलपा वदावो  आन कपाळेवूपर मोटो टीकों लगाडो, डाढी वदावो, वानावानार सोंग करन समाजेन गूमराह करो हानु म कनाई कोनी को.

वसोज वैदीक वेदांतीक यज्ञ, हवन, पूजापाठ करो, तिर्थसेत्र श्रद्धास्थान वारी जत्रा भरावो, मूर्तीर पूजा करो, धर्म बनावों, धर्मगूरू बणावो, धर्मपीठ बनावो, धर्मपरीषद बणावो, महंत बणावो, समाजेर गादीपर बेसन कोरीकोरेवूर धर्मेरो प्रचार प्रसार करो, समाजेम आर एस एस आजेंडा चलावो, धर्मेर गादी पर बेसन राजकारन करो, मार नामेर पावरेरो राजकारनेसारू वापर करो आसो म कांयीज केयेन छेनी.

वसोच म विया कोनी कीदो तो मार वेलेम दूसरे कोईज मनकीया गूतायेन छेनी कतो म विया कोनी कीदो तो मार वेलेर वंशज कू करन रीय ? करन म केनी ठेका देयेन छेनी. म केनी हानू करो करन केयेन करेन छेनी. 

म गोरमाटीम केनी नास्तिक, केनी बामसेफी, केनी कांयी केनताणी गोरमाटी गोरमाटीम बूद्धीभेद करन फूट पाडेन छेनी. म कोई गोरमाटी भाई, बाईबापडी, छीजार चूकरोभी वेणू तो वू प्रश्न सवाल चिकित्सा कर छ करन वोन धमकी दीनो कोनी. केरीवूपर केस करेन छेनी केनी गोरभाईन कोर्ट कचेरी लगू पुछायेरो काम मारे हाथेती कनायीच वीयो कोनी.

वसोच अभिव्यक्ति स्वतंत्रता पर प्रश्न पुछेरो, सवाल करेरो, स्वातंत्र्य मनेमायीर शंका विचारेरो स्वतंत्र आसे मौलीक अभिव्यक्ति स्वतंत्रता र मूल्येन गोरमाटी समाजेम निर्बंधन लागीये आसे कृत्य म करेन छेनी.

वसोच ठेटेतीच हर वातचितेपर गोर करते आयेवाळे समाजेरो सामाजिक नसाबेन निर्बंधन लान बंदकरेर वैचारिक गूलामीम समाजेपर लाद सकूनी. गोर छ तो वो गोर करेजवाळ आज न सवार गोरमाटी बणेजवाळ.

म सेवाभाया बोलरो छू. मार वात हारदं कर लीजो, आब म होटो फरन कोनी आयेवाळो. तम गौर छो तो गौर करेवाळ गोरमाटी रीजो.

से हे न सकेती रीजो..!