हिंदोळे परेर गिद गोर बंजारा तीज सॉन्ग लिरिक्स

Song Title :- Hindolo Parer Banjara Teej Song 

Lyrics :- Gor Kavi Rahul Bhukiya 

Singer : - Gor Mahi

Lable :- Gor Mahi Banjara Official 

Recording Studio :- Gor Mahi Asola

🏳 जै गोर जै मरीयामा जै सेवालाल 🏳

🐉🐉🐉 नागपंचमी (पछमी) 🐉🐉🐉

गोर वयीवाटेर आन नागपंचमीर कतीच नाळ जुटती दकायनी क गोरूर सन तेवारेर आन नागपंचमीर काही नातो जुडतो दकायनी. गोर वेयीवाट यी एक सोतंतर वयीवाट छ जेम सोतार सन तेवार येरी रीती वाते छ. जे आज तम हाम सिके साके डोडसांळे लोकुर कारणेती गोर वेयीवाट भुलाती वलाती जारीच. वोन जिवत रकाडेर वेणु तो सबेती पेले बोली जतन करणु लागीय कातो बोली जतन विय तो यीतीयास जतन वेयवाळ छ. गोर नागपंचमी ये सनेन पछमी कच ये पछमी न गोरमाठी हिंदोळो नाकतेते पछमी कनेती तो पोळार करे तोणी नितर पच तिज तुटे तोणी गोरुर नंगरीम हिंदोळो रेतोतो. याडी भेण कुणसेच बापु भगत भोपा देव धरमेम न गुताता ये मिणाम नायकेर घरेहुड्यांग आयीर झाडेन(लिंबेर झाडेन) हिंदोळो बांधन हिंदोळो हिचेर आणंद लेतीती. आन याडी भेण हिंदोळेप आसे गिद वटातीती क माठी माणसेर आकीम सदा पाणी आवजातोतो. आसे तराती अक्रोश वो गिदे मायीन व्यक्त करतीती. 
🌹🌹🌹🌹🌹🌹🌹🌹🌹🌹🌹🌹

गिद 1:-

सातणो पिळीय पीलोणेर वेल ये,
सातणो काका बाबारी दोयी भेन ये,
सातणो ऐके लुंगेण दोयी खाया ये,
सातणो काळ पडीय भम जाया ये,
सातणो सकाळ पडीय मलजाया ये,
सातणो बापु घर जाजो मोती बोलजो,
सातणो बापुर खबर मण केदी जो,
सातणो धेयेन जाजो मोती बोल जो,
सातणो पाणीयान जाजो मोती बोल जो,
सातणो पिळीय पीलोणेर वेल ये,
सातणो ऐके वेलेरी से भेण ये,
सातणो पिळीय पीलोणेर वेल ये,
🌸🌸🌸🌸🌸🌸🌸🌸🌸🌸🌸🌸

गिद 2:-

कागला सोणो पीतळ तारो देश रे,
कागला वूचीसी हवेलीम रेश रे,
कागला मारी याडीन मत केस रे,
कागला तारी बेटीरो वनवाश रे,
कागला सोणो पीतळ तारो देश रे,
🌼🌼🌼🌼🌼🌼🌼🌼🌼🌼🌼🌼

गिद 3:- 

विरा रे हिंदोळेरी, खाड उंडी खोदोरे,,
विरा रे हिंदोळेंरी, सोनेरी थंमे लगारे,,
विरा रे हिंदोळेंरी, खाड उंडी खोदोरे,,
विरा रे हिंदोळेन, चांदीरी साखळ लागारे,,
विरा रे हिंदोळेरी, खाड उंडी खोदोरे,,
⚘⚘⚘⚘⚘⚘⚘⚘⚘⚘⚘⚘

गिद4:-

रुणझुण रूणझुण गाडी केरी आयीये,
गाडी आती वकिल विरेणारी बायीये,
सासु तो देकन मुडो मोडी बायीये,
पोळी तो पोव मेली विरा थाळी वाडमेलीरे,
सासु तो कच मारो धोणो कुण धोयरे,
विरा मारो धोबी लगाय मारी बायीये,
तरी तोण माहेर लेजायुं मारी बायीये.........!!1!!
रुणझुण रूणझुण गाडी केरी आयीये,
गाडी आती वकिल विरेणारी बायीये,
ससरो तो देकन मुडो मोडो बायीये,
गादी तो घालमेली विरा पलंग राळमेलीरे,
ससरो तो कच मारो पाणी कुण भरीय,
विरा मारो बायां लगाय मारो बायीये,
तरी तोण माहेर लेजायु मारी बायीरये......!!2!!
🌺🌺🌺🌺🌺🌺🌺🌺🌺🌺🌺🌺🌺

आसे तराती हिंदोळेप गिद बोलण सारी लोकुर मणेन मोहीत करेवाळ मारे याडी भेण छ. आन मारी याडी भेण आज भी तांडे पेडेप यी संस्कृती जतन करच आन गोर वेयीवाट टकान रकाड च यी वात देकन मणेण घणो आनंद मळच. आन आसी तराती गोर वेयीवाटेम पछमी यी सन मणावच पण आज जर विचार किदेतो संस्कृतीर विकृती वेती जारीच आन गोरूर हिंदोळो ये सनेर महत्व कमी वेतो जारो छ. आन गोर हिंदोळो हिचेर सोडन आज नागपंचमी लार लागते बेठेच करण से तांडे पेडेर *नायक-नायकण, कारभारी-कारभारण, हासाबी-हासाबण, आसामी-आसामण, डायसांणो-डायसांणी से लावालसकर, मार याडी भेण, भायी बंद, गणगोत, सगासळेण मारोजा छ क गोर वयीवाट टकाण रकाडणु आन हिंदोळो यी सन टकाणो आसो मारोजा.....जै गोर जै सेवालाल....🏳🏳

                      ✍ लकेवाळो ✍
               गोर रावुल नारायण भूकीया
 (गोर साहित्य दळ अमरावती विभागीय संयोजक)
      तांडो धुळापुर ता. दारव्हा जी. यवतमाळ